Spitridate mort, il avoit deſja fait dire chez elle, par une Femme d’Armenie qu’il avoit mite aupres de cette Princeſſe, du temps qu’elle eſtoit à Artaxate, & qui eſtoit abſolument à luy ; que Spitridate avoit eſté laiſſé comme mort, & hors de pouvoir d’eſchaper : de ſorte qu’Araminte ne penſa jamais croire Anaxaris, lors meſme qu’il luy dit la verité toute pure. Cyrus aprenant ſon deſespoir, fut la conſoler, & l’aſſurer qu’Anaxaris ne luy avoit parlé de Spitridate que comme il luy en parloit à elle : mais pour luy teſmoigner encore combien ſon repos luy eſtoit cher, apres s’eſtre bien fait marquer l’endroit où Anaxaris avoit laiſſé Spitridate ; il fit venir le Prince de Paphlagonie, & le pria de vouloir envoyer quelqu’un des ſiens, pour sçavoir preciſément ce qu’eſtoit devenu cét illuſtre Prince. Araminte remercia Cyrus, avec toute la civilité que ſa douleur luy pouvoit permettre : la Reine de la Suſiane eut un ſoin tout particulier d’elle en cette occaſion : Cleonice & toutes ſes Amies ne l’abandonnerent pas non plus : & à la reſerve de Phraarte, tout le monde partageoit ſon deſplaisir. Il eſt vray que s’il n’en eut point de l’accident arrivé à Spitridate, il en eut aſſez de la civilité qu’Araminte eut touſjours pour Anaxaris, depuis qu’elle sçeut qu’il avoit elle le Liberateur de ſon Amant. Joint auſſi qu’elle commença de le traiter encore plus mal qu’à l’ordinaire : s’imaginant que ce ne pouvoit eſtre que pour luy, que Spitridate l’avoit nommée infidelle. Ainſi la maligne joye que Phraarte avoit euë du malheur de ſon Rival, ne luy dura pas long-temps : & il ſouffrit alors tout ce que l’amour & la jalouſie peuvent faire endurer.
Cependant Cy rus, le Roy d’Aſſirie, & le Prince Artamas,
