Page:Scudéry - Artamène ou le Grand Cyrus, quatrième partie, 1654.djvu/593

veu, la phyſionomie de ce jeune cavalier fut ſi nouvelle à ſes yeux, qu’il conclut en luy meſme avec certitude qu’il le trompoit. Si bien que luy reſpondant tres civilement, il luy dit qu’il ne ſe ſouvenoit point de l’avoir veu : & que par conſequent il croyoit qu’il ſe méprenoit luy meſme : puis que ce n’eſtoit guere ſa couſtume, d’oublier des gens qui avoient ſur le viſage un carractere de Grandeur, comme il le voyoit ſur le ſien. En fuite dequoy, le faiſant remonter à cheval, & le priant de luy dire quand, & en quel lieu il croyoit l’avoir veu ? cet agreable Eſtranger luy dit en meſme langage qu’il avoit deſja paſſé, qui eſtoit Grec un peu corrompu ; qu’il avoit eu le bonheur de le rencontrer dans un Bois qui eſtoit en Paphlagonie : n’ayant qu’un Eſcuyer avecque luy, & eſtant attaqué par ſix hommes, de la violence deſquels il avoit taſché de le deffendre. Je ne sçay, luy dit Cyrus, ſi je ne devrois point vous laiſſer en l’erreur où vous eſtes, de peur d’eſtre ſoupçonné de ne vouloir pas reconnoiſtre un bien fait : neantmoins pour vous détromper, & m’empeſcher en meſme temps d’eſtre accuſé d’ingratitude, sçachez genereux Eſtranger, que je m’engage à vous recompenſer autant que je le pourray, du ſervice que vous avez rendu à celuy pour qui vous me prenez. Mais apres cela, je vous aprendray qu’il y a un Prince au monde à qui je reſſemble de telle ſorte, qu’en divers lieux de la Terre, nous avons eſté pris l’un pour l’autre : c’eſt pour quoy, comme je ne doute pas que ce ne ſoit luy que vous avez ſecouru, & que je m’intereſſe extrémement en ſa vie & en ſa fortune ; faites moy la grace de me dire ce que vous en sçavez, &