Page:Scudéry - Artamène ou le Grand Cyrus, quatrième partie, 1654.djvu/549

faire, & ne me voyant pas le viſage d’une perſonne qui ſe ſeroit trouvée mal ; quoy, Iſmenie, me dit-elle, il n’eſt pas vray que vous ſoyez effectivement un peu malade, & toutes vos pleintes n’ont eſté que pour chaſſer cette compagnie ! du moins dites moy donc, adjouſta-t’elle, que vous l’avez fait pour m’obliger, car il eſt vray qu’elle m’importunoit extrémement. Mon principal deſſein, luy dis-je, n’a pas eſté ce luy de vous plaire : & vous sçaurez bien-toſt qu’en cette rencontre, j’ay encore plus regardé l’intereſt d’un autre que de vous. En diſant cela, j’ouvris la porte de mon Cabinet : & l’y faiſant entrer en la pouſſant doucement de la main, j’entray viſtement apres elle, afin d’en refermer la porte. Mais à peine eut-elle fait un pas, que voyant ce pretendu Phrigien, elle s’arreſta toute ſurprise : elle la fut pour tant encore plus, lorſque ſe jettant à ſes pieds, & luy prenant la main ; enfin, Madame, luy dit-il, je ne pouvois plus vivre ſans vous voir. Cleonice reconnoiſſant dés la premiere parole, la voix d’une perſonne qui luy eſtoit ſi chere, ne put s’empeſcher d’avoir un premier ſentiment de joye, & de me pardonner la tromperie que je luy avois faite : de ſorte que le relevant tres civilement, elle répondit au compliment qu’il luy avoit fait, d’une maniere auſſi ſpirituelle qu’obligeante. Mais un moment apres, conſiderant que ſi on sçavoit que Ligdamis fuſt deſguisé dans Epheſe on l’arreſteroit, & que peut-eſtre on feroit un crime d’eſtat, de ce qui n’eſtoit qu’un effet d’amour, une partie de ſa joye diminua : & ce qui augmenta encore ſon inquietude, fut qu’elle creut que ſi cette entre-veuë eſtoit sçeuë, cela ſeroit tort à ſa reputation : ſi bien que ſe repentant preſques des paroles obligeantes qu’elle