Page:Scudéry - Artamène ou le Grand Cyrus, quatrième partie, 1654.djvu/42

Roy de Phrigie luy dit que Soſicle le ſatisferoit là deſſus, quand il l’auroit agreable : & luy feroit mieux comprendre la cauſe de l’entrepriſe dont il faloit attendre l’effet. Apres cela Araſpe vint trouver Cyrus, pour l’advertir que la Reine de la Suſiane, & la Princeſſe Araminte eſtoient arrivées le ſoir auparavant, à une petite Ville qui n’eſtoit qu’à quarante Stades du Camp : de ſorte que Cyrus ne le sçeut pas pluſtost, qu’il leur envoya faire compliment : & le lendemain il y fut luy meſme, ſuivi ſeulement d’Hidaſpe, & de quelques autres, ne voulant pas y mener le Prince Phraarte, de qui la paſſion affligeoit Araminte. Mais comme Panthée s’eſtoit trouvé mal la derniere nuit, il ne vit que la Princeſſe Araminte, à qui il rendit conte de l’eſtat des choſes ; sçachant bien qu’elle auroit de la joye d’aprendre, que peut-eſtre ſans combatre le Roy ſon Frere, pourroit on finir cette guerre. Mais comme elle ne pouvoit pas comprendre parfaitement tous les divers intereſts de ceux qui tramoient la choſe, à moins que de sçavoir toute la vie de deux perſonnes fort illuſtres, qui en faiſoient tout le fondement : elle teſmoigna avoir une ſi forte envie de l’aprendre, que Cyrus pour la ſatisfaire, luy promit qu’il ne la sçauroit luy meſme exactement qu’en ſa preſence. Et en effet, ayant envoyé prier le Roy de Phrigie de luy envoyer Soſicle, il le fit au meſme inſtant : de ſorte que comme il y avoit encore aſſez de temps pour luy donner audience, parce que Cyrus eſtoit allé de fort bonne heure viſiter cette Princeſſe : Soſicle ne fut pas pluſtost arrivé, que le faiſant aprocher, & le preſentant à Araminte ; Voila, luy dit-il, Madame, celuy qui doit contenter voſtre curioſité & la mienne : & vous