Page:Scudéry - Artamène ou le Grand Cyrus, quatrième partie, 1654.djvu/362

à l’aller voir, ſon artifice reüſſit : & comme Aglatidas & moy sçeuſmes qu’elle y eſtoit, nous y fuſmes, renvoyant nos gens apres que nous fuſmes entrez. Menaſte avoit ordonné que l’on diſt chez elle à tout autre qu’à nous qu’on ne la voyoit pas : car pour Ameſtris, eſtant Amies comme elles l’eſtoient, la choſe ne tiroit pas à conſequence. & perſonne ne pouvoit s’offencer de n’entrer pas, quoy que l’on viſt ſon chariot à la porte. Lors que nous entraſmes dans la Chambre, Ameſtris eſtoit aſſise ſur le Lict de Menaſte ; de for te qu’Aglatidas fut à genoux devant elle, auparavant qu’elle euſt pu voir qu’il eſtoit entré. Madame, luy dit-il en l’empeſchant de ſe lever, ſouffrez que je vienne vous dire mes raiſons : de peur que vous ne fuſſiez accuſée d’une injuſtice effroyable, ſi vous m’aviez condamné ſans m’entendre. Ameſtris ſans reſpondre à Aglatidas, regarda Menaſte, comme l’accuſant de l’avoir trompée : & en effet elle ſeroit ſortie, ſi ſon Amie prenant la parole, & la retenant par ſa robe, ne l’en euſt empeſchée. Mais Menaſte, luy dit-elle, que penſera-t’on de moy, ſi on sçait que j’aye veu Aglatidas ? Mais, Madame, repris-je, que pourrions-nous dire de vous, ſi vous ne vouliez pas ſeulement eſcouter les pleintes d’un homme que vous voulez rendre malheureux ? S’il ſe pouvoit juſtifier, repliqua-t’elle, je l’eſcouterois avec un plaiſir extréme : mais cela n’eſtant pas, pourquoy voulez-vous que je m’expoſe à mettre une tache à ma reputation, que rien ne sçauroit effacer ? je ne sçay, Madame, ſi j’ay raiſon, interrompit Aglatidas, en croyant comme je fais qu’il ſuffit en certaines occaſions de sçavoir que l’on n’eſt point coupable, ſans ſe foncier ſi fort de ce que les autres en penſent. Car