perdu leur peine, je vous euſſe dit ce ſoir à voſtre retour le nom des perſonnes qui vous ont demandée. Alors contre-faiſant touſjours admirablement l’innocent & l’ingenu, il ſe mit à luy vouloir faire le dénombrement de ceux qui avoient eſté chez elle ce jour là, commençant par Aglatidas & par moy, & voulant continuer par Tharpis & par Artemon. Mais Ameſtris l’interrompant toute en colere, de voir que les reſponces de cét homme ne la juſtifioient pas pleinement, le renvoya ; & luy fit connoiſtre par certaines paroles menaçantes, qu’il n’avoit qu’à ſe preparer à changer de Maiſtresse.
Quand il fut party, Ameſtris regardant Aglatidas, connut bien dans ſes yeux qu’il n’eſtoit pas ſatisfait ; & que quelque effort qu’il fiſt pour cacher ſon chagrin, on voyoit qu’il en avoit pourtant beaucoup. Je voy bien, luy dit-elle, que les reſponses de mon Portier ne m’ont gueres juſtifiée dans voſtre eſprit : il eſt vray Madame, repliqua t’il, que ce n’eſt pas de luy que je dois attendre le repos dont j’ay beſoin. C’eſt pourtant luy qui vous a refuſé la Porte, repliqua-t’elle, & qui a eſté cauſe que Megabiſe eſt entré, quand meſme la choſe ſe ſera paſſée comme il le dit. Je l’advouë, reprit Aglatidas, touteſfois pourveû que Megabiſe n’ait point eſté preferé par vos ordres, il m’importe beaucoup moins qu’il vous ait veuë : Mais pour sçavoir cela, Madame, il faut que ce ſoit de voſtre bouche que je l’aprenne. Si vous voulez bien vous fier à ma parole, luy dit-elle, vous ſerez bien-toſt en repos : car je vous proteſte Aglatidas, que je n’ay donné nul ordre aujourd’huy, ny d’ouvrir ny de refuſer la porte à qui que ce ſoit : & que ſi j’avois eu à faire exception de quelqu’un, ce n’auroit pas eſté de Megabiſe.
