qu’il n’euſt jamais eu d’envie de s’informer de l’advenir : tout d’un coup entendant parler de la Sibille Heleſpontique avec tant d’eloges ; il ſe determina d’y envoyer : & y envoya en effet Ortalque, avec ordre de luy demander quand il devoit eſperer quelque repos : & de luy en raporter la réponſe écrite de ſa main.
En ce meſme temps, la Princeſſe Araminte le ſomma de luy tenir ſa parole : & luy meſme ſouhaittant extrémement ce qu’elle deſiroit, il dépeſcha Aduſius vers le Roy de Pont, qui eſtoit touſjours à Epheſe : pour le ſupplier de vouloir obtenir de Creſus, la liberté de parler à la Princeſſe Araminte, qui vouloit l’entretenir de quelque choſe qui luy importoit beaucoup. Ce Prince reçeut Aduſius fort civilement : & le faiſant attendre, il envoya à Sardis demander à Creſus la permiſſion de parler à la Princeſſe ſa Sœur, ce que le Roy de Lydie luy accorda. Ils convinrent donc enſemble le Roy de Pont & Aduſius, que cette entre-veuë ſe feroit à un Temple qui eſt à une petite journée d’Epheſe ; ayant ſeulement chacun cinq cens Chenaux pour Eſcorte. Aduſius avoit eu ordre de s’informer de la ſanté de la Princeſſe Mandane : & par les intelligences de Menecée, il sçeut qu’elle ſe portoit bien : mais il ne put jamais luy parler, ny luy faire rien dire. Eſtant donc revenu au Camp, & le jour ayant eſté pris, où l’entre veuë du Roy de Pont, & de la Princeſſe ſa Sœur ſe devoit faire : le meſme Aduſius qui l’avoit negociée ; eſcorta cette Princeſſe : Araſpe s’en eſtant excuſé, & Araminte n’ayant pas voulu que le Prince Phraarte l’accompagnaſt comme il le vouloit. Auparavant qu’elle partiſt, Cyrus & le Roy d’Aſſirie la viſiterent : & luy dirent tout ce que l’intereſt qu’ils avoient en cette negociation
