Prince a auſſi voulu confronter ce Tableau avec celuy qu’il garde touſjours, & qui fut fait en meſme temps que l’autre ; & ne pouvant ſe laiſſer de regarder le Billet d’Elſimene, dont il reconnoiſſoit ſi bien l’eſcriture, que comme je l’ay dit, il ne pouvoit pas douter que ce n’en fuſt ; il a donné cent marques de gratitude & de reconnoiſſance, & à Thimettes, & à moy : & tout impatient d’apprendre cette agreable nouvelle à l’illuſtre Cyrus, il l’eſt allé trouver à l’heure meſme, & m’a commandé de le ſuivre : laiſſant Thimettes & Acrate dans la liberté de ſe repoſer, car nous ſommes venus avec une diligence extréme. Ainſi, Madame, j’eſpere que dans d’eux ou trois jours on aura nouvelle aſſurée que cette entrepriſe importante aura heureuſement reüſſi.
Soſicle ayant finy ſon recit, la Princeſſe Araminte le remercia de la peine qu’il avoit euë de parler ſi long temps : & le loüa fort d’avoir sçeu démeſler ſi nettement une hiſtoire, dont les evenemens eſtoient ſi extraordinaires & ſi embrouillez. Cyrus de ſon coſté luy dit cent choſes tres obligeantes : apres quoy Soſicle s’eſtant retiré : Seigneur, dit la Princeſſe Araminte à Cyrus, n’aurez vous pas la generoſité de me promettre, que quand les Dieux vous auront rendu la Princeſſe Mandane, vous ne regarderez plus le Roy mon frere comme voſtre Rival ? je vous promets bien plus que cela, luy repliqua t’il, puis que je vous promets de le ſervir malgré luy, comme ſon Amy que je veux eſtre ; et. De luy redonner la Couronne de Pont : car pour celle de Bithinie, luy dit il, en ſous-riant, il la faut laiſſer entre les mains d’Arſamone : afin que le Prince Spitridate vous la puiſſe donner un jour. Comme ils en eſtoient-là, le Roy
