Page:Scudéry - Artamène ou le Grand Cyrus, quatrième partie, 1654.djvu/192

que fit Cleandre, fut de paſſer devant le Temple de Diane : voulant du moins voir le lieu où demeuroit ſa Princeſſe, puis qu’il ne la pouvoit pas voir elle meſme. Cependant, Madame, il arriva une choſe aſſez extraordinaire pour la conſolation de ces illuſtres Amants : qui fut que celle qui commande les Vierges voilées, & qui ſe nomme Ageſistrate, ſe trouva eſtre Sœur d’une Dame d’Epheſe, dont Menecée dans ſa jeuneſſe avoit eſté fort amoureux : & qu’il auroit eſpousée, ſi ſes parents ne s’y fuſſent pas oppoſez. Si bien que cette Dame luy ayant cette obligation, il eſtoit touſjours demeuré une grande amitié entre eux, quoy qu’il y euſt long-temps qu’ils ne ſe fuſſent veus : Menecée luy ayant meſme rendu des ſervices conſiderables aupres de Creſus, en la perſonne du Mary qu’elle avoit eſpousé, & qui eſtoit mort depuis ce temps là. Enfin, Menecée ſe confiant à elle, luy repreſentant l’injuſtice de Creſus : de ne vouloir pas ſouffrir que Cleandre ſe juſtifiast, & que la Princeſſe ſa Fille fiſt voir ſon innocence : il fit ſi bien, qu’elle obtint de ſa Sœur que Cyleniſe entreroit dans l’enclos du Temple, & ſeroit miſe aupres de la Princeſſe : n’oſant pas encore luy demander la permiſſion de la faire parler à Cleandre, de peur d’eſtre refuſé, & de luy nuire au lieu de le ſervir. Il vous eſt aiſé de vous imaginer, quelle joye fut celle de la Princeſſe Palmis, de revoir ſa chere Cyleniſe : & d’aprendre par elle que Cleandre eſtoit hors de priſon, & qu’il eſtoit meſme à Epheſe. Ce n’eſt pas qu’elle n’euſt beaucoup d’inquietude, par la crainte qu’elle avoit qu’il ne fuſt reconnu, & qu’il ne fuſt repris : mais enfin Cyleniſe luy ayant dit qu’il ſortoit peu, ſi ce n’eſtoit vers le ſoir, ou le