Page:Scudéry - Artamène ou le Grand Cyrus, quatrième partie, 1654.djvu/100

Cpendant quelque temps s’eſtant paſſé ſans qu’il arrivaſt aucun malheur an Prince Atys, les eſprits commencerent de ſe r’aſſurer, à la reſerve de celuy de Creſus : qui abſolument preocupé de la crainte qu’il avoit, voulut ſonger à le marier promptement. Mais la difficulté eſtoit de luy choiſir une femme : car il ne vouloit qu’Anaxilée, & Creſus euſt bien voulu qu’il en euſt choiſi une autre. Le Prince Adraſte toutefois commença d’ébranler un peu ſon eſprit : mon Pere y ſervit auſſi extrémement, à la priere de Cleandre : qui creût qu’il luy eſtoit touſjours advantageux, de donner un exemple d’une Alliance inégale ; de diminuer le prix des ſoings d’Adraſte en les partageant avecques luy ; & de ſatisfaire le Prince Atys, qui neantmois parut eſtre plus obligé du contentement du Roy ſon Pere au Prince Adraſte, qu’à Cleandre ny à Timocreon. Enfin, Madame, ce Mariage ſe fit avec beaucoup de magnificence : mais à la reſerve des deux Amants & d’Adraſte, ce ne fut pas avec beaucoup de joye. Creſus n’y avoit conſenti qu’avecques peine : la Princeſſe Palmis n’eſtoit pas fort ſatisfaite de voir au deſſus d’elle une Fille née ſi fort au deſſous : Antaleon & Mexaris qui n’euſſent pas eſté trop aiſes que ce Prince ſe fuſt marié à une Reine, ne pouvoient pas l’eſtre qu’il eſpousast ſa Sujette : Arteſilas & Cleandre qui croyoient auſſi que quoy qu’ils euſſent pu faire, ce Mariage authoriſoit encore Adraſte, en eſtoient bien faſchez, car Cleandre n’y avoit ſervi que par adreſſe, & que parce qu’il ne le pouvoit empeſcher : le Prince Myrſile avoit touſjours tant de melancolie pour ſon propre malheur, qu’une Alliance beaucoup plus illuſtre que celle là ne l’auroit guere reſjouï : & le ſeul Abradate, & la Princeſſe de Claſomene, eſtoient abſolument