Page:Sallust - Traduction de Jean Baudoin, 1616.djvu/15

l’histoire

de c. salvste,

de la conivration

de Catilina.

TOvs hommes qui deſirent ſurmonter les autres animaux doiuent faire en ſorte que leur memoire ne meure pas auec eux, & ne point paſſer leur vie comme les beſtes que la nature a formees la reſte en bas, & ſubjectes à leurs appetits. Or toute noſtre force & vertu conſiſte en l’eſprit & au corps. L’eſprit nous ſert d’ordinaire de maiſtre, & le corps de valet. L’vn nous eſt commun auec les Dieux ; & l’autre auec les beſtes. C’eſt pourquoy i’eſtime qu’il vaut beaucoup mieux ^[1] s’acquerir de la gloire par les moyens de l’eſprit, que par ceux du corps : Et, s’il eſt poſſible, rendre noſtre memoire immortelle, puis que la vie dont nous jouyſſons eſt ſi courte. Car où il n’eſt rien ſi paſſager & ſi freſle que la gloire qui vient des richeſſes & de la beauté, la vertu ^[2] eſclatte, & nous met en honneur pour iamais.

C’est la verité qu’il y a long temps que les hommes ont debattu ; ſcauoir, ſi la Milice s’agrandiſſoit pluſtoſt par la force du corps que par la vertu de l’eſprit : Car au meſtier de la guerre, ^[3] il ſe faut bien bien conſeiller auant que rien commencer, & le conſeil pris, executer promptement. Ainſi ces deux choſes inſuffiſantes d’elles-meſmes, ont beſoin d’vne mutuëlle aſſiſtance.

1. S’acquerir de la gloire.] S’il eſt ainſi qu’il ſe treuue deux ſortes de biens, dont les vns ſont humains, à ſçavoir la ſanté, les forces, les beautez, & les richeſſes : Et les autres diuins, comme la prudence, la force, la temperance, & ainſi des autres vertus, il n’y a point de doute que les biens humains ne ſubſiſtent iamais en vn meſme eſtat, & que les diuins ſont eternels. Car (comme dict fort bien [Pro Milone.] Ciceron) entre toutes les vertus, s’il faut auoir eſgard au ſalaire, il n’en eſt point de comparable à celuy de la gloire. C’eſt elle qui nous faict viure apres la mort, & qui n’eſt iamais ingratte à ceux qui la cheriſſent.
2. Nous ammabliſt.
3. Il ſe faut bien conſeiller.] Les grands hommes d’Eſtat, dit [In Annibalis vita.] Plutarque, doiuent pluſtoſt regarder la fin que le commencement d’vne entrepriſe, & balançer toutes choſes auec vn bon conſeil, auant que prendre les armes.