Le texte de cette page a été corrigé et est conforme au fac-similé.
Je me tiens seur, qu’aussy je perviendray.
Je ne dy pas qu’un Marot deviendray,
En mon Esprit cest erreur ne repose.
Mais tel chemin, soubz vostre adveu, tiendray,
Qu'à la parfin je seray quelque chose.
A un grand prometteur sans effect.
Que me proffite ta promesse,
Si tu ne me la veulx tenir ?
Je suis ainsy qu'un Chien en lesse,
Que me proffite ta promesse ?
Tu me fays de grands biens sans cesse,
Pourtant je n’en veoys rien venir.
Que me profite ta promesse,
Si tu ne me la veulx tenir ?
A un Marchant, qui luy demandoit
de sa vie.
Vous demandez, Amy trescher,
De quoy, où, et comment je vys.
De quoy ? de pain, de vin, de chair,
Ainsy que font tous hommes vifz.
Où, vous en estes vis a vis,
Je ne me voys de vous cachant.
Comment ? ainsy à mon advis,
Que doibt vivre un loyal Marchant.
