Le texte de cette page a été corrigé et est conforme au fac-similé.
Que ne croyez legierement,
Je sçay qui fait ce parlement,
Un Amy m’en a adverty,
Mais fasché n’en suis grandement,
Car je sçay bien qu’il a menty,
De s’Amie et de soy.
Les Mesdisants , par leur meschant langaige,
Ont fort tasché de rompre nostre accord :
Mais tant s’en fault qu’ilz y mettent discord,
Que nostre Amour en croistrà davantaige.
À Frere L. de Claveyson, prieur
de Parnans.
Que l’habit ne fait pas le Moyne.
Comme la Foy sans les Oeuvres est morte,
Et en soy n’a justification,
Né plus né moins, le Froc qu'un Moyne porte,
Donner ne peut sanctification,
Si lon ne fait mortification
De ceste Chair et sa concupiscence.
L’habit (de soy) demonstre une Innocence,
Mais innocent te juger n’est idoine.
Regarder fault le faict, non l’apparence.
Le simple Froc, ne fait pas le bon Moyne.
