Le texte de cette page a été corrigé et est conforme au fac-similé.
À Madamoiselle Beringue.
Vous n’estes point né Royne, né Princesse,
Et ne tenez cent mil' escus de rente,
Mais vostre tendre et premiere jeunesse,
Et grand doulceur, joincte à rare simplesse,
Plus que tous biens du Monde, me contente.
A F. I. Marron, pourquoy le vray
bien est interdit.
Si nous veoyons le vray bien estre hay,
Amy Marron, et à tous interdit,
Il ne t'en fault de rien estre esbahy,
Car jesuchrist de long temps l'a prédit.
Ce Monde icy tousjours luy contredit,
Et à jamais aux siens contredirà,
Mais qui desire estre mis en credit,
Qu'il soit meschant, de luy bien on dirà.
A Madamoiselle Marie marquet,
sa Mere.
Qu’Innocence, quoy qu’elle soit mo-
lestée, ne peut estre opprimée.
Iniquité souvent a fort tasché,
Par faulx rapport opprimer Innocence.
