Or fault il donc, Frere et Amy perfaict,
Nous departir ainsy subitement ?
Pour ce depart point ne serà deffait
De nostre Amour si beau commencement.
Nous departons, mais des Corpz seulement,
Au Cueurs serà toujours l'Amour certain,
De quoy pour vous laisser enseignement,
Il vous plaira me garder ce huictain.
De Madamoiselle Beringue.
Je ne sçay point lequel plus me martyre,
Son doulx parler, ou son picquant regard,
De son parler comme enchesné m’attire,
Dedans ses yeulx est Cupido, qui tire
Contre mon Cueur, d'Amour le mortel dard.
D’elle mesme et de soy.
L’homme qui est bien expert en la chasse,
Quoy qu’en chassant rencontre doublement,
Les deux pourtant ensemble ne pourchasse,
Ains il s'arreste à un tant seulement :
Car il sçait bien, qu’en faisant aultrement,
Est en danger de perdre tous les deux.
J'ay à choisir d’Amyes si je veulx,
Mais une j'ay seulement retenue,
