J'ay des Parents, mais ilz sont froids Amys,
S’ilz sont Amys, se disent sans pouvoir.
Si pouvoir ont, sont lasches et remis
A mayder, et bref n’ont le vouloir.
Quoy que ce soit, ne font bien leur debvoir
De me monstrer ce bon vouloir par faict.
Mais je ne neulx te parler sans l’effect,
Ne telz semblants par dehors apparents,
Et si concludz, qu’un seul Amy perfaict,
Vault cent fois mieulz, que mille telz Parents.
Epitaphe, de feu Monsieur maistre Foulcaud
Mosnier, procureur de Fontevrault,
et son Parrain, parlant en sa
personne.
Vif et mort suis, mort quant au Corps en terre,
Vif en Esprit, lequel estant icy
Au paravant dedans son Corps en serre,
Vivre ne peut, mais tousjours fut transsy.
La Foy en Dieu luy a causé cecy,
Car en laissant, par Mort, la chair mortelle,
Par elle a prins une vie immortelle,
Celeste vie, et vie incomparable.
Tasche (Chrestien) mourir d’une Mort telle,
Et me seras entierement semblable.
