Le texte de cette page a été corrigé et est conforme au fac-similé.
A un, qui le dehortoit de mettre
ses Oeuvres en lumiere.
Chascun Marot, escripvant ne peut estre,
Pour attirer le Lecteur par doulx stile.
Un chascun n’est comme Sceve bien dextre,
Pour fulminer d’invention subtile,
Chascun, n’a pas son Esprit tant fertile
Que Sainct Gelays, il ne sensuit pourtant,
Que celuy là qui n’en peut faire aultant,
En ses escriptz soit du tout inutile.
Contre Fortune, fait au departir de luy
et Madamoiselle Beringue.
Fortune, ò faulce, ò par trop envieuse,
En regardant nostre conjunction,
Tu as esté jour et nuict curieuse,
D’elle et de moy faire disjunction.
Tu as des Corps fait separation,
Voulant ainsy ce lyen dettacher.
Mais ne failloit par ce moyen tascher
D’y pervenir. Car, ò folle obstinée,
Nostre Amytié ne pourras arracher,
Dedans nos Cueurs si viſ enracinée.
