Pour celuy qui choisissoit Juno,
signifiante Richesses.
C’est un bon cas que le don de Beaulté,
Et un bon cas, que le don de Saigesse.
Mais non pourtant, quand tout est bien compté,
Il n'est rien tel que d’avoir grand richesse.
En tout pays on prise la Noblesse,
On prise l’or, rentes, et revenu,
L'homme puissant est par tout bien venu,
Et en Honneur il emporte le pris,
il appert donc, que qui a retenu
Juno pour soy, il a saigement pris.
Pour celuy qui choisissoit Venus,
signifiante Beaulté.
Ayez Richesse, et thresors amassés,
Ayez aussy tant que vouldres, Prudence,
C’est bien beaucoup, mais ce n’est pas assés,
Pour reformer la perfaicte alience.
Car si Beaulté ne gouverne la dance,
On ne pourroit y veoir aulcun plaisir.
Beaulté nous est l'esguillon du desir,
D'où l'Amour vit sans faire departye,
Par ainsy mieulx pour luy n’eust peu choisir,
Qui à Venus choisy pour sa partye.
