Bien justement personne on peut priser,
Qu'on prenne droit devers vous son addresse,
On y pourra ces troys dons adviser.
Mais toutefoy (sans ceulx cy depriser)
Un aultre avez de plus grand'excellence,
C'est uostre Esprit remply de grand prudence.
Cas singulier, car n'est point de don tel.
Les troys premiers iront en decadence,
Le dernier est perdurant immortel.
A Madame la Duchesse d’Estampes.
Juno,Venus, & Pallas, trois ensemble,
Ont heu debat merveilleux à vous veoir.
S'a dit Juno, mienne est comme me semble,
Pour son grand los, sa noblesse, et avoir.
Mais, fist Venus, pour moy la veulx avoir,
Car en beaulté au Monde n'a seconde.
Quoy, dist Pallas, sa tres noble facunde,
Son bel Esprit, ses Graces, la font mienne.
Laquelle aurà des trois la Pomme ronde,
Pour vous tenir justement comme sienne ?
