Qui proces a, ( Monsieur ) n'est sans affaire,
Eust il pour soy le maulvais, ou bon Droict.
Quand tout est faict, soubdain c'est à refaire.
On n'y cognoist né l'envers, né l'endroit.
Le Droict y cloche, et le boiteux va droict,
L'Aveugle y veoit, le veoyant n'y veoit goutte,
Au grand chemin n'y a sentier né routte,
On y perd sens en maintenant le sien.
Plus on y met, plus on perd. Somme toute,
A tort ou droict, tout proces ne vault rien.
A Monsieur de Sainct Romans
Conseillier de Grenoble.
De tous costés ( treshonnoré Seigneur )
Cruellement Fortune me poursuit :
Et tous les jours, apres un grand malheur,
Aultre plus grand cruellement me suit.
Si cecy dure, un desespoir s'ensuit,
Pour le dernier remedde à mes travaulx.
Mais si vous plaist m’ayder en mes durs maulx.
D’en eschapper pour ce coup fais mon compte,
Pardonnez moy, Monseigneur, si je faulx.
Faulte d’argent fait perdre toute honte.
Sur la naissance de la fille de Mon-
sieur le Baron d’Entraigues.
Ce bel Enfant ont voulu venir veoir,
Juno, Venus, et Pallas, troys ensemble,
