Le texte de cette page a été corrigé et est conforme au fac-similé.
En toutes Artz, la fin l'oeuvre perfait,
Le bon Ouvrier on congnoist à l'ouvrage.
A la Ville d’Arles en Provence,
d’où est natifve Madamoi-
selle Beringue,
s’Amie.
En forme de complainte.
Ò Arles noble, et antique Cité,
Pourray je bien ma complainte te dire?
J'ay tant souffert chés toy d’adversité.
Louer te doibs je. ou plus tost te mauldire?
Il ne te peut me molester souffire.
J'avois desjà tant de maulx eschappé,
Helas, j'y suis de rechief attrapé.
Tu as voulu me priver de la vie
Du coup mortel de ma senestre Main.
Persecuté fus apres par Enuie
D’aulcuns des tiens : mais l’effort inhumain
À ( Dieu mercy ) à la fin esté vain:
Donc chascun d'eulx l'aultre en honte regarde,
En seurté vit celuy là, qui Dieu garde.
Ces maulx pourtant n'ont saoullé ton desir,
Que plus en plus à tort ne me poursuive.
