Clement Marot parla le temps passé
Fort librement, quand il le pouvoit faire.
Et maintenant, le tout bien compassé,
Se taist aussy, quand luy convient se taire.
A vostre advis, esse petit affaire,
Que retenir, et lascher son langaige,
En s’applicquant au plus commun usaige,
Et attendant ( par un tresprudent soing )
L'heure, et le temps ? Ò Clement Marot saige,
Qui sçait parler, et se taire au besoing.
De Madame la Duchesse d’Estampes.
Pour sa tresgrande, et bien rare Beaulté,
Elle est la floeur entre toutes nommée:
Et tant pleine est de grand Honnesteté,
Qu'elle est de tous entierement aymée,
Beaulté la fait Parangon reclamée.
L'honnesteté la nompareille aussy.
Par l’un a bruit, par l’aultre, est renommée,
Et par tous deux est perfaicte sans Sy.
A Madame de Molans,
pour Estrennes.
De vous donner il n’est en ma puissance,
Vous soubhaitter, je ferois grand deffault.
