Le texte de cette page a été corrigé et est conforme au fac-similé.
Que nul n’est bon, fors seullement
Le Seigneur Dieu, certainement
Tu n’es pas Dieu, mais pecheur. Doncques
Je te diray tout haultement,
Qu’homme de bien tu ne fuz oncques.
A Madamoiselle Beringue,
de la servitude d’Amour.
La liberté, qui jadis estoit mienne,
Par toy, Belle, est mise en captivité.
Doncques il fault que ton serf je me tienne,
Suyvant le Sort de ma nativité.
J'avois long temps le péril evité
Mais vaincu suis par fatale ordonnance,
Qui me promet, que j'auray allegeance
Par grand doulceur joincte à rigoeur tresrudde,
Et par ainsy j'obtiendray delibvrance
Par mon contraire. Ò doulce servitude.
Pour un Gentil homme,
qui envoyoit des
Gans à sa
Dame.
Gans, advantaige à ce que j'ay perdu,
Allez, soyez aux coiffes recompence.
