Page:Rutebeuf - Oeuvres complètes, recueillies par Jubinal, tome I, 1839.djvu/436

404

NOTES

Mès Diex fet le pardon por restorer sa perte
A cels qui souferront por lui la grant poverte.

Por .i. poi de science que Diex lor a aprise
Fet .i. potier .i. pot, puis avient que il brise ;
Li potiers prent la terre et dépièce et esfrise,
Puis en refet .i. pot tout d’autre tele guise.

Dont ne fist Diex le pot et si fist le potier ;
Puis qu’il puet le pot et fère et depecier,
Dont a bien Diex pooir de fère mort entier :
Jà n’estoit-il nus hom quant Diex fist le premier.

En paradis n’a âme qui ne soit en desir
Que li jugemenz viengne por les cors aemplir
Des biens et des granz joies que Diex lor fet sentir ;
Mès jà celes d’enfer n’en querroient issir.

Mès eles sevent bien que toutes i seront
Celes qui en enfer et en paradis sont.
Devant le jugement quant li cors resordront,
Toutes celes d’enfer lor paines doubleront.

Merveille est comment hom devient popelican :
Il n’estoit hom ne fame quant Diex forma Adan.
Cil qui fet porter l’arbre noviau fruit chascun an
Puet bien le mort revivre sanz paine et sanz ahan.

Qui pensseroit parfont aus oevres Jhésu-Crist
Qui ciel et mer et terre et toutes choses fist,
Cele herbe et cele fueille qui muert et raverdist,
Jà ne cuit ne ne croi que bougres devenist.

Il n’a angle n’archangle, ne sains en paradis,
Tant voie sovent Dieu, ne tant soit ses amis
Qui sache pas à dire com Diex est poestis.
Tenons-nos-en à tant que Diex nos a apris.

Il n’i a saintuaire ne si dur oissement,
Tant soit ore gardez en or et en argent,
Que trestoz ne porisse et deviegne noient,
Et tuit rassambleront au jor du jugement.

Or prions Jhésu-Crist, qui fist le firmament