Page:Rutebeuf - Oeuvres complètes, recueillies par Jubinal, tome I, 1839.djvu/432

400

NOTES

Tout ce qui plest au cors est à l’âme contrère ;
De ce que li cors veut n’en a l’âme que fère ;
Et quant li cors s’atorne et acort à bien fère,
Mult est liez Jhésu-Criz quant il à lui repère.

Grant honor fet Diex l’omme, comment qu’il ait vescu,
Quant il ist de péchié en sa bone vertu ;
Et quant il atent tant que la mort l’a vaincu,
C’est li mauvès vessiaus où li vins est perdu.

Mult est bone la pomme tant qu’ele est saine et dure ;
Ele vaut assez miex que s’ele est trop meure,
Quar puis qu’ele amolie et torne à porreture
Fors la covient geter por ce c’on n’en a cure.

Je voi maint grant bourgois et maint grant clerc riche homme
Qui ont tant de l’avoir qu’il n’en sevent la somme,
Jà n’iront outre mer, n’à Saint-Jaques, n’a Romme :
Cil se lessent porir com la mauvese pomme.

Diex ! il n’est hom ne fame, tant sache estre au deseure,
Qui se puisse desfendre quant la mort li cort seure.
Por noient vit au siècle qui por Dieu ne labeure,
Et li cors nos faudront, jà ne garderons l’eure.

Il a moult en cest siècle paine et triboulement :
Li .i. rachate s’âme et li autres la vent ;
Tel i a qui emprunte, tel i a qui rent :
Toz cis siècles est foire, mais l’autre ert paiement.

Hélas ! que ferons-nos qui empruntommes tant ?
Or déussons paier et rendre maintenant.
Qui ne s’acuitera, il sera meschéant ;
Fols est qui tant atent qu’il ne puet en avant.

Quant li dui champion se sont tant combatu,
Covient-il que l’uns perde le baston et l’escu ;
Quant il ont tant bouté que l’uns est abatu,
Por ce n’est-il pas quites s’il se claime vaincu.

Je l’ di por maintes gens qui devisent entr’aus :
La bone pénitance, dient, nos fera saus.
Sor ce si se délitent ès péchiez criminaus ;
Mès tel s’i asséure qui est et fols et faus.