Et tos les bons sirjans du monde,
Et de çà et de là la mer
Vous sauroie bien aconter :
Ge sai tant et si sui itex :
Ge connois toz les menestrex,
Cil qui sont plus amé à cort,
Dont li granz renons partot cort.
Ge connois Hunbaut Tranche-Coste
Et Tiecelin, et Porte-Hotte,
Et Torne-en-Fuie et Brise-Voire,
Et Bornicaut, ce est la voire,
Et Fierabras et Tutebel,
Et Male-Branche et Mal-Quarrel,
Songe-Feste à la grant viele,
Et Grimoart qui chalemele,
Triant, Traiant et Enbatout.
Des menestrex connois itout,
Qui me vorroit metre à essai,
Que plus de mille nomer en sai.
Ge sai bien servir un prudome,
Et de beax diz toute la some :
Ge sai contes, ge sai flabeax,
Ge sai conter beax diz noveax,
Rotruenges viez et noveles,
Et sirventois et pastoreles[1] :
Ge sai le flabel du Denier[2],
Et du Fouteor à loier[3],
Et de Gobert et de dame Erme,
Qui ainz des els ne plora lerme ;
Et si sai de la Coille noire,
Si sai de Parceval l’estoire,
Et si sai du Provoire taint
Qui o le Crucefiz fu painz ;
Du Prestre qui menja les meures
Quant il devoit dire ses heures :
Si sai Richalt, si sai Renart,
- ↑ Les rotruenges étaient des chansons à ritournelle qu’on chantait en s’accompagnant de la rote ; les serventois ou sirventes étaient des pièces ordinairement satiriques, et les pastorelles sont celles où il était question d’aventures de bergers ou de bergères.
- ↑ J’ai imprimé ce Fablel dans mon recueil intitulé Jongleurs et Trouvères, page 94.
- ↑ Voyez les Fabliaux de Méon : la plupart de ces pièces s’y trouvent.
