appellez aux charges publiques, & maniement d'estat, pour bien s'acquiter de leur devoir, doivent estre versez, en celles, qui contiennent la façon de gouvernement, la meilleure, qui se puisse trouver. Il est vray que les histoires Romaines, & Grecques, qui nous sont plus cognuës, donnent suffisamment dequoy, pour instruire ceux qui prennent la peine de les lire ; mais parce qu'elles sont si familières on les mesprise presques, & on se contente d'en ouyr rapporter par fois quelque piece à propos, ou en sermon, ou en propos familiers.
Toutesfois celle-cy parce qu'elle est nouvelle, & qu'elle vient de l'autre Monde, & ce du bout de l'Orient, & d'un Royaume si policé, qu'il ne cède en rien aux Republiques Grecques & Romaines, mesme les surpasse en beaucoup de choses, qui touchent la bonne police, & l'integrité des Magistrats, j'ose bien presumer qu'elle vous sera tres-agreable, tant pour le soin, & le désir que vous avez de maintenir le bon ordre, & la police de vostre ville, que pource que vous apprendrez en quel point, sont les affaires de la foy Catholique, en ces quartiers là, ou elle commence à poindre, apres si longues ténèbres, au grand contentement de toute la Chrestienté. Je ne le dis pas sans cause, tout le monde scait avec quelle joye vous entendistes, & plusieurs de ceste ville les premières nouvelles de la conversion d'aucuns de ce Royaume, pour la bonne affection que vous portez à la foy de vos ancestres, jusques à monstrer par effect le désir que vous aviez d'avoir part à
