mier, & monta ſur le ſecond, puis ſe mit au grand
galop.
Le Roy entendant la bleſſeure de l’Amiral,
quitta le ieu, où il eſtoit encores iouant auec le
duc de Guyſe : ietta la raquette par terre, & auec
vn viſage triſte & abbatu, ſe retira en ſa chambre :
le duc de Guyſe ſortit auſsi peu apres le Roy, du
ieu de paume.
La chambriere du logis interrogee, reſpondit,
que le ſeigneur de Chailly (qui eſt maiſtre d’hoſtel
du Roy, & ſuperintendant des affaires du duc
de Guyſe) le iour auparauant auoit mené l’arquebouzier
dans le logis, & l’auoit affectueuſemẽt
recommandé à l’hofteſſe.
Le laquais interrogué, reſpond que ce iour-la,
bien matin, ſon maiſtre l’auoit enuoye à Chailly,
pour le prier de faire en ſorte, que l’eſcuyer du
duc de Guyſe, tint les cheuaux qu’il luy auoit promis
tous preſts : Quant au nom de ſon maiſtre, il
n’y auoit pas long temps qu’il eſtoit à luy & ne l’auoit
ouy appeller que Bolland, l’vn des ſoldats de
la garde du Roy : mais à la vérité dire, c’eſtoit
Mont-reuel de Brie, celuy qui aux guerres paſſees
tua en trahiſon le ſeigneur de Mouy.
Le roy de Nauarre, le prince de Cõdé, le
comte de la Roche foucaut, & pluſieurs autres Seigneurs,
Barons, & gentils-hommes Huguenots,
aduertis de la bleſſeure, vindrent incontinent viſiter
l’Amiral : il y vint auſsi pluſieurs autres ſeigneurs,
& gentils-hommes Catholiques, amis de
l’Amiral, tous biẽ fort marris de ce qui luy eſtoit
auenu.
