entretenement digne de ſa qualité.
Qu’il deſiroit auſsi auoir de l’Angleterre, le
myllord de Lyceſtre, & le myllord Burgley, ou l’ũ
d’eux, pour les feſtoyer & traiter, comme il deſire
de careſſer tous les loyaux ſeruiteurs de ſa ſœur
la royne d’Angleterre, en ſigne de vraye alliance.
Que le Roy auoit enuoye ſa foy au prince d’Orenge,
& l’auoit donnée au comte Ludouic ſon frere,
de leur aider & les ſecourir en tout & par tout,
contre le roy d’Eſpagne : & que ſans cela, iamais
ils n’euſſent rien entreprins de remuer en l’eſtat
de Flandres.
Que combien que monſieur de Genlis & ſes
gens qu’il leur menoit euſſent eſté deffaits, le Roy
ne lairroit à leur enuoyer de nouueau, & biẽ toſt,
vn braue & puiſſant ſecours.
Que Iean Gileas Fregoze aſſeuroit, que pour
ceſte guerre de Flandres, le duc de Florence
preſteroit au Roy, ou au prince d’Orenge, deux cens
mille ducats.
Que les affaires vont ſi bien en Flandres, que
l’Agent du Roy pres le duc d’Albe, donne continuellement
auis au prince d’Orenge, & communique
auec luy par letres & meſſages, tous les
deſſeins qu’il peut entendre du duc d’Albe, & le prince
d’Orenge à l’Agent tous les ſiens : tellement
que quand il n’y auroit autre choſe que ceſte bonne
intelligence, elle eſt ſuffiſante à faire bien
eſperer aux plus timides.
Mais qu’il y a bien plus, c’eſt que l’armee de
Stroſſy, & du Baron de la garde, ne ſont près de la
Rochelle, que pour attẽdre la flotte venant d’Ef-
