neuois de l’iſle de Corſe, ayant iuré & donné ſa
foy aux Princes, ſeigneurs, & grans perſonnages
de Corſe, qu’il appella au conſeil, & de là au banquet, leur
fit à tous trencher la teſte.
Charles ſeptieme, roy de France, apres pluſieurs
guerres & tumultes arriuez en ſon Royaume,
ayant fait alliance, & contracté affinité auec
le duc de Bourgongne, & promis d’oublier toute
iniures & inimitiez paſſees : & pour le mieux aſſeurer,
ayant tout cela iuré ſur ſon hoſtie conſacree,
le fit venir pour le feſtoyer à Montereau
faut-yonne, & en le careſſant, il le tua ſur le pont
d’Yonne.
Et pluſieurs autres, deſquels le recit ſeroit lõg
& ennuyeux, les exemples deſquels on ramentoit
ordinairement au Roy, auec le chapitre dixhuitieme
du liure du prince de Machiauelli, où il traitte
comme c’eſt que les princes doyuent garder la
foy : ſurquoy ſes maiſtres d’eſcole (auſsi peu ſoucieux
de ſa conſcience que de ſa reputation) font
des additions & gloſes plus dangereuſes, que le
meſme texte : Partant ſoyez diligent à prendre
garde à vous, n’y ayant autre remede d’eſchapper
qu’en fuyant hors de la cour, que ie puis appeller
Sodome.
L’Amiral ayant veu ceſt eſcrit, fit fort
mauuais viſage à celuy qui le luy bailla : Et renuoya
pour route reſponſe, dire à celuy qui luy auoit
enuoyé, Que ſi par le paſſé il auoit eu, & les autres
Huguenots auſsi, occaſion de ne ſe fier pas legeremẽt
en des promeſſes que, Dieu merci, telle peur
ou deffiance eſtoit alors ſans fondement.
