Les longs & obſtinez ſieges, tant de rudes & furieux
aſſauts & autres exploits & ruſes de guerre
eſtoyent baſtans pour emporter des places
beaucoup plus fortes. Et toutesfois Dieu a tellemẽt
pourueu aux ſiens par vne admirable bonté
& prouidence, & a tellement encouragé le peu
qui reſtoit qu’ils ont fait teſte à toute la force de
leurs fiers & ſanglans ennemis ſans ſecours d’aucun
de leurs voiſins, quoy que les ennemis en
ayent emprunté de toutes pars ſelon leur couſtume,
ayans perdu de leurs gens en ces trois ſieges
plus qu’ils n’auoyent perdu en toutes les trois
guerres paſſees.
Cela me fait, quand ie le conſidere, eſperer encores
plus auant. Que comme Dieu par vne faueur
ſpeciale : & ſecours extraordinaire a beſongné
iuſqu’à preſent, qu’auſſi vn iour en nos preſences
& deuant nos yeux ou des noſtres, il fera
l’entiere vengeance du ſang innocent reſpandu
& nous dõnera vn tel relaſche que nous n’oſeriõs
demander pour luy ſeruir ſans nulle crainte en
toute paix & ſeureté. Ce qui me le fait ainſi croire
outre les promeſſes que nous en auons en l’Eſcriture,
& l’eſſay que Dieu en a fait freſchement
en telle deliurãce eſt ce que i’ay particulieremẽt
marqué en l’election du Roy de Pologne, laquelle
n’eſtant faite (ce ſembloit) que pour aſſouuir
l’ambition du Duc d’Aniou, a neantmoins
ſeruy à faire venir d’vn pays bien fort lointain
des hommes Chreſtiens & genereux pour
porter parole vertueuſement pour le ſoulagement
des bons : lors que nos affaires eſtoyent en
