mes effets que l’Euangile aſſailly a accouſtumé
de produire. Il a repouſſé les efforts de l’ennemy,
& renforcé ceux qui le deffendoyẽt, pendãt qu’ils
ont eſté au guet & ſur leurs gardes. Mais quand
ils ſe ſont endormis leur a laiſſé coupper la gorge :
& en fin il eſt demouré entre les mains des
gens de bien ſans leur pouuoir eſtre arraché. Le
Seigneur a fait tout cecy ſe monſtrant grand & admirable
en la conſeruation des ſiens.
Le pol. Cela eſt ſans doute : or eſcoute, afin que
i’acheue de te dire, ce qui s’eſt paſſé durant ce ſiege
de la Rochelle. Apres que les deputez de l’ennemy
& les noſtres eurent parlementé des moyẽs
de paix, voyant que nos freres de la Rochelle demandoyent
par leurs articles pluſieurs choſes cõcernans
toute l’Egliſe Françoiſe, & ne vouloyent
entendre à aucun accord, quoy qu’ils fuſſent merueilleuſement
preſſez, affligez & haraſſez, ſans que
de meſme le reſte de nos freres receuſt vn bõ ſoulagement
en ſes oppreſſes, remonſtrans qu’il n’eſtoit pas
honneſte qu’vn de leurs membres ſouffriſt
peine ou plaiſir : ſans faire part & du mal & du
bien aux autres membres de leur corps. Voyãt,
dis-ie, qu’ils inſiſtoyent à cela, l’ennemy leur accorda
qu’ils peuſſent librement communiquer auec
ceux de Montauban, & ceux de Montauban
auec eux pour le benefice de paix.
Et de fait ceux de Montauban vindrent, comme
ie t’ay voulu dire, durant le ſiege à la Rochelle
auec memoires de nos autres freres, ſous ſaufconduit
de l’ennemy : & meſlerent leurs demandes
& celles qu’ils eſtimerent eſtre bon de faire,
