que les Rochellois apres Dieu doyuent au ſeigneur
de la Noue, tout ce qu’ils ont du premier
cœur & de l’aſſeurance qu’ils eurent ſur ces premiers
commencemens, qu’il leur mit le cœur au
vẽtre, qu’il les ordonna mieux qu’on ne ſcauroit
dire, qu’il les aguerrit leur faiſant faire pluſieurs
bonnes & belles ſorties auec leur auantage qui
leur ſeruoit de bonne curee, luy eſtant touſiours
le premier à la meſlee, & le dernier à la retraite.
Au ſurplus pource que le ſiege continuoit lõguement
deuant la Rochelle, que les bleds & poudres
approchoyent de leur periode, & l’eſperance
d’eſtre auituaillez alloit touſiours amoindriſſant.
Les Rochellois ayans pour leur conſeruation
fait tenter toute ſorte d’honneſtes ſecours
& remedes, furent contraints à la fin de regarder
comme de nouueau à leurs titres & liberté, pour
ſcauoir au vray quelle eſtoit l’obligation que pretendoit
la maiſon de Valois ſur eux, s’elle s’eſtendoit
iuſques là de leur pouuoir rauir leurs vies,
leurs biens, leurs honneurs & celuy de leurs femmes,
& leurs familles : & iuſques à les faire perdre
& damner auec tous les diables pour faire ſeruice
aux Valois, comme ils demandoyent en ſubſtance.
Surquoy ayans trouué par eſcrit en bonnes
& ancienes pancartes, que l’obligation eſtoit
fort petite & bien aiſee, ſous des conditions toutefois
qu’on leur auoit ſouuent rompu, eux ayans
touſiours de leur part plus ſatisfait, qu’à leur deuoir.
Et que lors c’eſtoit à tout rompre : apres auoir
fait clerement voir leurs droits au Conſeil,
qui pour ce fut aſſemblé d’entre eux & qu’ils eu-
