tous les iours letres de ce qui ſe paſſoit dedans &
dehors la Rochelle, nous entendiſmes que apres
que la Rochelle fut de toutes parts aſsiegee par
les Ianniſſaires du tyran, ſes deux freres y arriuerent
le 15 de Feurier 1573, menans le roy de Nauarre,
le prince de Condé, & le ieune comte de la
Rochefoucaut, comme en triomphe deuant eux,
auec bon nombre de Seigneurs Catholiques, de
courtizans, d’Atheiſtes, d’Epicuriẽs, de blaſphemateurs,
de Sodomites, & d’autres tels officiers,
que le tyran auoit chaſſé d’aupres de luy & de ſa
cour, non qu’il fuſt marry de voir tels galans pres
de ſa perſornne : ce ſont ſes mignons fauoris, ce
ſont ſes appuis & ſouſtien & les delices de ſa Mere :
ains tout deſpit, tout enragé, blaſphemant touſiours
de cholere, de ce qu’vn chacun n’alloit pas,
comme il commandoit, en l’armee.
Depuis l’arriuee du duc d’Aniou, les Rochellois
furent aſsiegez de plus pres, battus de beaucoup
plus de pieces d’artillerie & en plus d’endroits
furent menez, eſcallez, aſſaillis & trauaillez
en toutes ſortes dont l’ennemy ſe pouuoit auiſer.
Eux de leur part faiſoyent le plus ſouuent ſorties
braues & gaillardes, aſſaillans courageuſemẽt les
ennemis iuſques dans leurs trenchees, & les eſtrillans
tellement le dos, ſous le ventre & partout,
que pluſieurs de nos ennemis contraints d’abandonner
la vie, quittoyent les charges les plus belles
à leurs compagnons ſuruiuans, qui bien ſouvent
ne gardoyent guere ce qu’on leur auoit delaiſſé,
eſtans les plus marris du monde de ce que
nos bons Rochellois les viſitoyent par trop ſou-
