le reputation & credit, eſmeu d’vne meſchante emulation
& ialouſie, & d’vne bonne opinion de
ſoy meſme : luy ſemblant bien d’auoir pour le
moins merité en ſauuant le Capitole des mains
des François, autant que meritoit Camillus en
les dechaſſant du tout. Cela fut cauſe que tout outré
d’enuie ne ſe pouuant contenir pour la gloire
& renom de Camillus, il alla ſemãt parmi le peuple
pluſieurs faux bruits encontre luy, & contre
les Senateurs Romains, pour les mettre en mauuaiſe
opinion enuers le peuple. Entre autres choſes
il diſoit que le threſor qu’on auoit aſſemblé
pour bailler aux François & racheter le Capitole,
auoit eſté vſurpé par quelques vns des grands :
que ſi on le pouuoit rauoir on le pourroit conuertir
au profit publique, ſoulageãt d’autant le peuple
des tributs ordinaires, ou en acquittant quelque
autre debte. Ces faux bruits, ceſte calomnie
ſembla de telle importance & de ſi dangereuſe
conſequence au Senat, qui voyoit deſia comme le
peuple commençoit à tumultuer, qu’il fut contraint,
pour remedier à la deſunion & deſordre
qui s’en pouuoit enſuyure, de recourir au moyen
extraordinaire, qui eſtoit accouſtumé parmi eux
és extremes dangers : ſcauoir de creer vn Dictateur
dedans Rome pour cognoiſtre de ce fait.
Le Dictateur creé, il fait appeller Manlius deuant
luy, & eſtant le Dictateur conduit au milieu
des Senateurs, & Manlius au milieu du peuple en
vne place publique. Là, Manlius fut interrogué
de ce qu’il ſcauoit du threſor publique, & luy fut
cõmandé de dire entre mains de qui il le cuidoit
