fuſt ſuyui des autres pais de la France. Ce ſeroit
vne belle pierre philoſophale, pour enrichir les
poures gens qui ſont rongez iuſques aux os par
les enfans de Catherine. Au moins ſeroyent-ils
deſchargez des impoſts & tailles nouuelles.
Le pol. Tu dis vray. Quant au ſurplus de la police
& l’ordre de Daniel, le Conſeil a eſté auſsi
d’auis de le pratiquer en ſubſtance, retenant touſiours
toutefois les noms des charges & eſtats accouſtumez
en leurs prouinces. Vray eſt qu’ils cognoiſſent,
qu’il y aura grande difficulté aux Elections
és premieres charges, pource, que le peuple
n’eſt pas accouſtumé d’aller, comme l’ancien
Romain querir leur Dictateur, leur maieur ou
gouuerneur à la charrue apres les bœufs. Et leurs
gouuerneurs n’ont iamais accouſtumé, comme
vn Quntius Cincinnatus, de retourner à la charrue
apres que la guerre eſt paſſee ou que leur charge
eſt expiree.
Ains au contraire vn Caporal veut eſtre quãd
& quand ſergeanr, le Sergeãt veut eſtre enſeigne,
l’Enſeigne lieutenant, le Lieutenant Capitaine.
Et ainſi touſiours en auant ſans s’abbaiſſer ny ſe
deſmettre, en danger de monter trop haut.
L’hi. Voila qui va mal. Les Romains quoy qu’ils
fuſſent autrement ambitieux & cupides d’hõneur
& gloire auoyent en telle recommandation le biẽ
& honneur de leur Republique, qu’ils quittoyent
volontiers du leur pour le ſalut de leur patrie.
En ceſt endroit principalement ils auoyent
cela de bon qu’ils ne refuſoyent point d’aller cõme
perſonnes priuees en vne armee, à laquelle
