beaucoup de ſes cõpagnons auec vn certain autre
liure qu’on nõme des fureurs Frãçoiſes, qu’vn Allemã
fit en Latin toſt apres les iours du maſſacre.
L’hi. Nous ſommes tous tenus à ceux qui s’eſſayent
de nous remettre le cœur au ventre, comme
on dit. Dieu vueille que tout cela ſerue à reſueiller
les ſept dormans.
Le pol. On m’a dit qui a ia ſerui & ſeruira encore
d’auantage, n’en doute pas. Les fers ſont biẽ
fort eſchauffez. Mais, pour reuenir à mon dire,
le Conſeil de Niſmes me fit auſsi entendre en ce
que touche les quarante articles de la police de
Daniel (car autãt y en a-il de marquez en ce Dialogue
imprimé) qu’ils les trouuoyent fort bons,
ſaincts & dignes d’eſtre obſeruez & gardez en ce
prĩcipalemẽt, qui touche la diſcipline Eccleſiaſtique
& la diſcipline militaire qu’ils confeſſoyent
eſtre la bride, l’eſperon, l’eſpee & le bouclier l’vne
de l’autre : & toutes deux enſemble la targe, la
garde & le ſouſtien de nous tous : ils trouuoyent
auſsi fort neceſſaire le dernier d’iceux articles,
ſuyuant lequel nos freres du Dauphiné ſe ſont reſolus
de ne iamais plus ſe deſarmer, qu’ils auoyẽt
arreſté de faire auſsi le ſemblable, iuſques à ce
qu’ils voyent la tyrannie bas & court bridee par
nos ancienes loix de la France auec des bons &
bien aſſeurez gages, gardiens de la liberté ciuile
des François. Et cependãt ils auoyent enuie de
dreſſer & entretenir apres tant de malheurs, qui
leur ſont auenus par leur ſotte credulité, vn eſtat
aſſeuré, qui approchaſt tant que faire ſe pourroit
de celuy qui eſtoit iadis en leurs prouinces.
