En Angleterre les Parlemens, qui ont meſme
puiſſance qu’auoyent les eſtats en France, ont ſouuent
condamné leurs Rois.
Cela eſt hors de toute doute que ceux qui ont
la puiſſance de deſlier, ont auſsi pouuoir de lier.
Et partant és lieux où ceſt ordre eſt eſtably,
qu’il y en a quelques vns qui ſeruent de bride aux
Rois, & aux loix de ſeure garde : ie dis que ceux là
ſans faillir peuuent & doiuent reſiſter aux iniques
ou prophanes commandemens des Rois. Et ne
peuuent ceux-là laiſſer la royauté & legitime gouuernement
degenerer en tyrannie ſans commettre
vne manifeſte trahiſon enuers le peuple : qui a
eſleu tels eſtats principalement à celle fin, qu’ils
empeſchent la tyrannie. Que ſi de malheur elle y
ſuruient, (comme nous la voyons par nos pechez
arriuee à ſon comble, diſpoſant des biens & des
corps, de l’honneur & de l’ame à ſon gré) c’eſt aux
ſuiets priuez de recourir au remede vers les eſtats :
eſtant choſe toute aſſeuree, que ces trois eſtats
ſont comme ſouuerains magiſtrats par deſſus
le Roy en ceſt endroit, quoy qu’ils ſoyent priuez
& au deſſous du Roy pour vn regard ordinaire.
Que ſi ce droit là des eſtats vient à deſcheoir
& à ſe perdre ? Ie te reſpõs, & fort bien ce me ſemble :
que les Rois qui ont ſi ſouuent en leur bouche,
qu’on ne preſcrit rien contre eux, nous enſeignent
auſsi de dire, qu’il n’y a point de preſcriptiõ
contre les droits du peuple & des eſtats. Et que
la loy ciuile de laquelle nous vſons, qui a la raisõ
pour ſon ame, nous enſeigne & apprẽt, qu’vn poſ-
