auſsi s’eſtendoit iuſques là, comme tu ſcay, qu’il
n’eſtoit permis au Rois de declarer, ny faire guerre,
ny d’impoſer tribut ou ſubſides nouueaux ſans
le conſentement des trois eſtats : eſquels neantmoins
les gens d’Egliſe n’eſtoyent aucunement
comprins : ains ſeulement ceux de la Iuſtice, ceux
de la Nobleſſe, & le Peuple. Et eſtoit leur authorité
telle, qu’ils depoſoyent les Rois quand l’occaſion
le requeroit pour leur desbauche, inſolence,
faineanciſe, incapacité & autres ſemblables
choſes.
Nos hiſtoires nous font mention , comme tu
ſcay trop mieux, de huict Rois de France deſmis
par l’authorité des Eſtats.
Childeric en eſt l’vn, deſmis en l’an 469. Eudon,
l’autre deſmis vn peu apres. Vn autre Childeric,
l’an 679. Theodoric l’an 696. Chilperic
l’an 750. Charles le Gros, l’an 890. Odon, l’an
894. Charles le ſimpie, l’an 926.
Quant à noſtre Charles le traiſtre, ils ne l’euſſent
ia deſmis : il n’eſt pas vray-ſemblable : ils euſſent
eu eſgard à ſes belles vertus, à ſa pieté, à ſa iuſtice :
ils euſſent porté reſpect à ſa mere qui peut
tout, & au Peron qui la ſurmonte, & gouuerne
tout à ſon tour.
Mais ſi la liberté des Eſtats, n’euſt eſté opprimee,
ils euſſent bien deſmis d’autres Rois, qu’on
euſt peu nommer bons, tresbons, les comparant
aux moindres traits de ceux que Charles a
ioué au poure & miſerable peuple : cõme les Romains
demirent Tarquin à raiſon de ſes outrages
& violences.
