pille, & le Paſteur à vn troupeau : non pas le pupille
au Tuteur, ou le troupeau au Paſteur. Il falloit
donc qu’il y euſt quelques aſſemblees & troupes
d’hommes deuant la creation des Magiſtrats.
Encores peut-on bien trouuer auiourd’huy vn
peuple ſans Magiſtrat, mais nullement vn Magiſtrat
ſans peuple : C’eſt donc le peuple qui a creé
le Magiſtrat & non le magiſtrat le peuple : qui a,
dis-ie, creé les premiers magiſtrats d’vn commun
conſentement, pour la neceſsité qu’il ſe ſentoit
auoir pour ſa conſeruation d’vn tel lien &
conduite.
Aucuns peuples ont creé des Princes ſur eux,
pour eſtre gouuernez & regis en ceſte façon ou
en l’autre, tellement toutesfois qu’il demouroit
touſiours par deuers le peuple vne bonne portiõ
de la puiſſance & anthorité. On voit cela en l’eſtat
Democratique, auquel aucuns eſleus en ceſte
charge demandent les auis & recueillent les
voix du peuple, n’oſans au reſte rien ordõner ſans
ſon conſentement. Ceux-cy ſont appelez Magiſtrats
populaires.
Autres y en a, qui ayans mieux aimé le gouuernement Ariſtocratique, ont choiſi & eſleu vn certain
nombre des meilleurs de leurs citoyens, auſquels
ils ont cõmis toute la conduite de leur eſtat
& choſe publique.
Ceux qui ont plus priſé le gouuernemert d’vn
ſeul, l’ont eſleu & eſleué ſur eux pour les gouuerner
& conduire comme Monarque & ſouuerain.
Mais il ne ſe trouuera iamais, qu’il y ait eu vn peuple
ſi ſot & mal aviſé, qui ait eſleué vn magiſtrat
