Cela eſt donc tout reſolu que nous pouuons
en bonne conſcience deſobeir aux edicts prophanes
ou iniques des Magiſtrats, quels qu’ils ſoyent.
Reſte à voir maintenant, s’on leur peut auſsi
pareillemẽt reſiſter en bonne conſcience, & pour
quelles raiſons : eſtant choſe toute aſſeuree, que
c’eſt plus leur reſiſter, que leur deſobeir ſimplement.
Ia n’auiene que ie fauoriſe en ceſt endroit le
party de ces furieux & turbulens Anabaptiſtes,
que nous confeſſons tous pouuoir eſtre dignement
chaſtiez par le Magiſtrat.
Qu’on ne penſe pas auſsi, que ie vueille porter
le party des Seditieux, pourtant, ſi ie viens affermer
que les ſuiets ſont tenus de reſiſter par armes,
ſi beſoin eſt, au Magiſttrat commandant chofes
prophanes ou iniques,eſtant vne telle reſiſtence,
qu’õ fait aux deſſeins d’vn Magiſtrat ſeditieux,
vn vray moyen d’oſter la ſedition, & faire mettre
vne bonne paix parmy les peuples.
Mais afin que la queſtion puiſſe eſtre plus clerement
traitee & deſnouee, ie mettray en auant
quelques maximes, comme preludes ſeruans à ce
faict.
Premierement qu’il y a vne mutuelle & reciproque neceſsitude & obligation d’entre le Magiſtrat
& les ſuiets : comme il eſt aiſé à cognoiſtre,
s’on conſidere l’origine, la cauſe & la fin de l’inſtitution
des magiſtrats.
Cela eſt bien certain que les magiſtrats ont
eſté creez aux peuples & non les peuples aux magiſtrats :
tout ainſi que le tuteur eſt cree à vn
pu-
