Cette page a été validée par deux contributeurs.
Primus.
Conclusion : toult va de mal em pire,
Tant hault que bas, soit reaume ou empire,
Et, se Chascun se plaint, il n’a point tort.
Secundus.
Par Dieu, Chascun a eu le temps bien fort.
Depuis dix ans, et toult par le discort
Des principaulx.
Le Prince.
Nostre astrologien
Point pour nyent n’en faisoit son raport.
Ce les signes ne sont d’ung bon acort.
Les allemens[2] ne seroient aler bien.
Primus.
Chascun se plaint.
Secundus.
Chascun dist qu’il n’a rien.
Primus.
Chascun seufre des douleurs non pareilles.
Le Prince.
Propos final, je veul dire et maintien
Que nous sommes cheus es ans de mervelles.
Primus.
Tel ne dit mot qui fait grandes orelles.
Qui toultez foys n’en pense de rien mains.
Secundus.
Tel fait penniés qui feroit bien corbelles,
Qui luy mettroit de bon boys entre mains.
