Je ne fçay meſme encor, quoy qu’il m’ait pû promettre,
Sur d’autres que ſur moy, ſi je dois m’en remettre.
Pyrrhus n’eſt pas coupable à ſes yeux comme aux miens,
Et je tiendrois mes coups bien plus ſeurs que les ſiens.
Quel plaiſir, de vanger moy-mefme mon injure,
De retirer mon bras teint du ſang du Parjure,
Et pour rendre ſa peine & mes plaiſirs plus grands,
De cacher ma Rivale à ſes regards mourans !
Ah ! ſi du moins Oreſte, en puniſſant fon crime,
Luy laiſſoit le regret de mourir ma Victime !
Va le trouver. Dy-luy qu’il aprenne à l’Ingrat,
Qu’on l’immole à ma haine, & non pas à l’Eſtat.
Chere Cleone cours. Ma vangeance eſt perduë,
S’il ignore, en mourant, que c’eſt moy qui le tuë.
Je vous obeïray. Mais qu’eſt-ce que je voy ?
O Dieux ! Qui l’auroit cru, Madame ? c’eſt le Roy.
Ah ! cours apres Oreſte, & dy-luy, ma Cleone,
Qu'il n’entreprenne rien ſans revoir Hermione.
Scène IV.
Ous ne m’attendiez pas, Madame, & je voy bien
Que mon abord icy trouble voſtre entretien.
