Vtrùm, la froidure hybernalle des Antipodes, paſſant en ligne orthogonalle par l’omogence ſolidité du centre, pourroit par vne doulce antiperiſtaſie eſchauffer la ſuperficielle connexité de noz talons.
Vtrùm, les pendans de la zone torride pourroyent tellement s’abbreuuer des cataractes du Nil, qu’ils vinſſent à humecter les plus cauſtiques parties du ciel Empiree.
Vtrùm, tant ſeulement par le long poil donné à l’ourſe metamorphoſee, ayant le derriere tondu à la bougreſſe pour faire vne barbutte à Triton, pourroit eſtre gardienne du pol Articque.
Vtrùm, vne ſentence elementaire pourroit alleguer preſcription decennalle contre les animaux amphibies, & è contra l’autre reſpectiuement former complaincte en cas de ſaiſine & nouuelleté.
Vtrùm, vne grammaire hiſtorique & metheorique, contendantes de leur anteriorité & poſteriorité par la triade des articles, pourroyent trouuer quelque ligne ou charactere de leurs croniques ſur la palme Zenonique.
Vtrùm, les genres generaliſſimes par violente eleuation deſſus leurs predicamens, pourroyent grimper iusques aux eſtages des tranſcendentes, & par conſequent laiſſer en friche les eſpeces ſpeciales & predicables, au grand dommaige & intereſt des pauures maiſtres es arts.
Vtrùm, l’omniforme Prothee ſe faiſant cigale, & muſicalement exerçant ſa voix es iours caniculaires, pourroit d’vne roſee matutine ſoigneuſement emballee au mois de May, faire vne tierce concoction deuant le cours entier d’vne eſcharpe Zodiacale.
Vtrùm, le noir Scorpion pourroit ſouffrir ſolu-
