Et posé le cas, qu’au sens literal vous trouuez matieres assez ioyeuses & bien correspondentes au nom, toutesfois pas demourer là ne fault, comme au chant des Sirenes : ains à plus hault sens interpreter ce que par aduenture cuidiez dict en gayeté de cueur.
Crochetastes vous oncques bouteilles ? Caisgne. Reduisez à memoire la contenence qu’auiez. Mais veistes vous onques chien rencontrant quelque os medulare ? C’est, comme dict Platon lib. ij. de rep., la beste du monde plus philosophe. Si veu l’auez : vous auez peu noter de quelle deuotion il le guette : de quel soing il le guarde : de quel ferueur il le tient, de quelle prudence il l’entomme : de quelle affection il le brise : & de quelle diligence il le sugce. Qui le induict à ce faire ? Quel est l’espoir de son estude ? Quel bien pretend il ? Rien plus q’vn peu de mouelle. Vray est que ce peu, plus est delicieux que le beaucoup de toutes aultres : pource que la mouelle est aliment elabouré à perfection de nature, comme dict Galen. iij. facu. natural & xj. de vsu parti.
A l’exemple d’icelluy vous conuient estre saiges pour fleurer, sentir, & estimer ces beaulx liures de haulte gresse, legiers au prochaz, & hardiz à la rencontre. Puis, par curieuse leçon & meditation frequente, rompre l’os, et sugcer la substantificque mouelle. C’est à dire : ce que i’entends par ces symboles Pythagoricques, auecques espoir certain d’estre faictz escors & preux à ladicte lecture. Car en icelle bien aultre goust trouuerez, & doctrine plus absconce, laquelle vous reuelera de treshaultz sacremens & mysteres horrificques, tant en ce qui concerne nostre religion, que aussi l’estat politicq & vie œconomicque.
Croiez vous en vostre foy qu’oncques Homere, escriuent
