Il ne peut davantage,
Soit que l’on veuille ou regarder l’ouvrage,
Ou la matière, et qu’on en juge à l’œil,
Rien ne se void en terre de pareil,
D’un rang espais les maisons compassées
Sont jusqu’au Ciel hautement avancées,
Et ce qui semble encores merveilleux,
Tous les logis sont palais orgueilleux,
Les murs sont hauts et longs et imprenables,
Et tellement en largeur admirables,
Que six chevaux lesquelz se rencontr’ont
Estans chargez à six autres de front,
Sans se heurter l’un ny l’autre en leur charge
Les passeront et y courront au large.
Voylà grand cas.
J’ay les murs mesuré,
Ilz peuvent bien avoir en leur quarré,
Sans point mentir, quinze toizes entieres,
Et en circuit il ne s’en faut de gueres
Qu’ilz ne soient longs comme jadis estoient
Ceux où les Roys d’Assyrie habitoient,
Qu’un homme prompt ne pouvoit à grand’peine
Circuir autour en une my-sepmaine.
0 Dieux puissans quelle longue largeur !
Quoy ! noz Cocus ont-ilz de leur labeur,
Sans estre aydez d’autres que de leur sorte,
Si tost basty une ville tant forte ?
