Page:Montaigne - Essais, Didot, 1907, tome 3.djvu/642

qu’il estoit allé de Madrid à Lisbonne, en plain esté, sans boire. Il se porte vigoureusement pour son aage, et n’a rien d’extraordinaire en l’vsage de sa vie, que cecy, d’estre deux ou trois mois, voire vn an, ce m’a-il dit, sans boire. Il sent de l’alteration, mais il la laisse passer et tient, que c’est vn appetit qui s’alanguit aiséement de soy-mesme et boit plus par caprice, que pour le besoing, ou pour le plaisir.En voicy d’vn autre. Il n’y a pas long temps, que ie rencontray I’vn des plus sçauans hommes de France, entre ceux de non mediocre fortune, estudiant au coin d’vne sale, qu’on luy auoit rembarré de tapisserie et autour de luy, vn tabut de ses valets, plain de licence. Il me dit, et Seneque quasi autant de soy, qu’il faisoit son profit de ce tintamarre comme si battu de ce bruict, il se ramenast et reserrast plus en soy, pour la contemplation, et que cette tempeste de voix repercutast ses pensées au dedans. Estant escholier à Padoüe, il eut son estude si long temps logé à la batterie des coches, et du tumulte de la place, qu’il se forma non seulement au mespris, mais à l’vsage du bruit, pour le seruice de ses estudes. Socrates respondit à Alcibiades, s’estonnant comme il pouuoit porter le continuel tintamarre de la teste de sa femme : Comnie ceux, qui sont accoustumez à l’ordinaire bruit des rouës à puiser de l’eau. Je suis bien au contraire : i’ay l’esprit tendre et facile à prendre l’essor. Quand il est empesché à part soy, le moindre bourdonnement de mousche l’assassine.Seneque en sa ieunesse, ayant mordu chaudement, à l’exemple de Sextius, de ne manger chose, qui eust prins mort, s’en passoit dans vn an, auec plaisir, comme il dit. Et s’en deporta seulement, pour n’estre soupçonné, d’emprunter cette regle d’aucunes religions nouuelles, qui la semoyent. Il print quand et quand des preceptes d’Attalus, de ne se coucher plus sur des loudiers, qui enfondrent et employa iusqu’à la vieillesse ceux qui ne cedent point au corps. Ce que l’vsage de son temps, luy faict compter à rudesse, le nostre, nous le faict tenir à mollesse.Regardez la difference du viure de mes valets à bras, à la mienne : les Scythes et les Indes n’ont rien plus eslongné de ma force, et de ma forme. Ie scay, auoir retiré de l’aumosne, des enfans pour n’en seruir, qui bien tost apres m’ont quicté et ma cuisine, et leur liurée : seulement, pour se rendre à leur premiere vie. Et en trouuay vn, amassant depuis, des moules, emmy la voirie, pour son disner, que par priere, ny par menasse, ie ne sçeu distraire de la saueur et