mais ceux aussi qui ne font que me menasser. Iniurieux vices, et en qualité, et en nombre. Qu’il me batte par là. l’embrasseroy volontiers l’exemple du philosophe Dion. Antigonus le vouloit piquer sur le subiet de son origine. Il luy coupa broche : Ie suis, dit-il, fils d’vn serf, boucher, stigmatizé, et d’vne putain, que mon pere espousa par la bassesse de sa fortune. Tous deux furent punis pour quelque mesfaict. Vn orateur m’achetta enfant, me trouuant beau et aduenant et m’a laissé mourant tous ses biens ; lesquels ayant transporté en cette ville d’Athenes, ie me suis addonné à la philosophie. Que les historiens ne s’empeschent à chercher nouuelles de moy : ie leur en diray ce qui en est. La confession genereuse et libre, enerue le reproche, et desarme l’iniure. Tant y a que tout conté, il me semble qu’aussi souuent on me loüe, qu’on me desprise outre la raison. Comme il me semble aussi que dés mon enfance, en rang et degré d’honneur, on m’a donné lieu, plustost au dessus, qu’au dessoubs de ce qui m’appartient. Ie me trouueroy mieux en païs, auquel ces ordres fussent ou reglez ou mesprisez. Entre les masles dépuis que l’altercation de la prerogatiue au marcher ou à se seoir, passe trois repliques, elle est inciuile. Ie ne crain point de ceder ou proceder iniquement, pour fuir à vne si importune contestation. Et iamais homme n’a eu enuie de ma presseance, à qui ie ne l’aye quittée.Outre ce profit, que ie tire d’escrire de moy, i’en ay esperé cet autre, que s’il aduenoit que mes humeurs pleussent, et accordassent à quelque honneste homme, auant mon trespas, il rechercheroit de nous ioindre. Ie luy ay donné beaucoup de païs gaigné : car tout ce qu’vne longue cognoissance et familiarité, luy pourroit auoir acquis en plusieurs années, il l’a veu en trois iours dans ce registre, et plus seurement et exactement. Plaisante fantasie : plusieurs choses, que ie ne voudroy dire au particulier, ie les dis au public. Et sur mes plus secretes sciences on pensées, renuoye à vne boutique de libraire, mes amis plus feaux :
Si à si bonnes enseignes, i’eusse sceu quelqu’vn qui m’eust esté propre, certes ie l’eusse esté trouuer bien loing. Car la douceur d’vne sortable et aggreable compagnie, ne se peut assez acheter à mon gré. El qu’est-ce qu’vn amy ! Combien est vraye cette ancienne sentence, que l’vsage en est plus necessaire, et plus doux, que des clemens de l’eau et du feu ! Pour reuenir à mon conte. Il n’y a
