Page:Montaigne - Essais, Didot, 1907, tome 3.djvu/440

iournees. Et aux extremes chaleurs, les passe de nuict, du soleil couchant iusques au leuant. L’autre façon de repaistre en chemin, en tumulte et haste, pour la disnec, nommément aux cours iours, est incommode. Mes cheuaux en valent mieux. Iamais cheual ne m’a failly, qui a sceu faire auec moy la premiere iournee. Je les abreuue par tout et regarde seulement qu’ils ayent assez de chemin de reste, pour battre leur eau. La paresse à me leuer, donne loisir à ceux qui me suyuent, de disner à leur aise, auant partir. Pour moy, ie ne mange iamais trop tard l’appetit me vient en mangeant, et point autrement : ie n’ay point de faim qu’à table.Aucuns se plaignent dequoy ie me suis agreé à continuer cet exercice, marié, et vieil. Ils ont tort. Il est mieux temps d’abandonner sa maison, quand on l’a mise en train de continuer sans nous quand on y a laissé de l’ordre qui ne demente point sa forme passee. C’est bien plus d’imprudence, de s’esloingner, laissant en sa maison vne garde moins fidele, et qui ait moins de soing de pouruoir à vostre besoing.La plus vtile et honnorable science et occupation à vne mere de famille, c’est la science du mesnage. l’en vois quelqu’vne auare ; de mesnagere, fort peu. C’est sa maistresse qualité, et qu’on doibt chercher, auant toute autre comme le seul douaire qui sert à ruyner ou sauuer nos maisons. Qu’on ne m’en parle pas ; selon que l’experience m’en a apprins, ie requiers d’vne femme marice, au dessus de toute autre vertu, la vertu economiique. Ie l’en mets au propre, luy laissant par mon absence tout le gouuernement en main. Ie vois auec despit en plusieurs, mesnages, monsieur reuenir maussade et tout marmiteux du tracas des affaires, enuiron midy, que madame est encore apres à se coiffer et altiffer, en son cabinet. C’est à faire aux Roynes encores ne scay-ie. Il est ridicule et iniuste, que l’oysiucté de nos femmes, soit entretenue de nostre sueur et trauail. Il n’aduiendra, que ie puisse, à personne, d’auoir l’vsage de ses biens plus liquide que moy, plus quiete et plus quitte. Si le mary fournit de matiere, Nature mesme veut qu’elles fournissent de forme.Quant aux deuoirs de l’amitié maritale, qu’on pense estre interessez par cette absence : ie ne le crois pas. Au rebours, c’est vne intelligence, qui se refroidit volon-