Il me semble que ie le promets, quand ie le dy. Ainsi i’euente peu mes propositions. La condemnation que ie fais de moy, est plus vifue et roide, que n’est celle des iuges, qui ne me prennent que par le visage de l’obligation commune : l’estreinte de ma conscience plus serree, et plus scuere. Je suy laschement les debuoirs ausquels on m’entraîneroit, si ie n’y allois. Hoc ipsum ita iustum est quod rectè fit, si est voluntarium. Si l’action n’a quelque splendeur de liberté, elle n’a point de grace, ny d’honneur.
Où la necessité me tire, i’ayme à lacher la volonté. Quia quicquid imperio cogitur, exigenti magis, quàm præstanti acceptum refertur. I’en sçay qui suyuent cet air, iusques à l’iniustice : donnent plustost qu’ils ne rendent, prestent plustost qu’ilz ne payent : font plus escharsement bien à celuy, à qui ils en sont tenus. Je ne vois pas là, mais ie touche contre.I’ayme tant à me descharger et desobliger, que i’ay parfois compté à profit, les ingratitudes, offences, et indignitez, que i’auois reçeu de ceux, à qui ou par nature, ou par accident, i’auois quelque deuoir d’amitié : prenant cette occasion de leur faute, pour autant d’acquit, et descharge de ma deble. Encore que ie continue à leur payer les offices apparents, de la raison publique, ie troue grande espargne pourtant à faire par iustice, ce que ie faysoy par affection, et à me soulager vn peu, de l’attention et sollicitude, de ma volonté au dedans. Est prudentis sustinere vt cursum, sic impetum beneuolentiæ. Laquelle i’ay trop vrgente et pressante, où ie m’addonne : aumoins pour vn homme, qui ne veut estre aucunement en presse. Et me sert cette mesnagerie, de quelque consolation, aux imperfections de ceux qui me touchent. Ie suis bien desplaisant qu’ils en vaillent moins, mais tant y a, que i’en espargne aussi quelque chose de mon application et engagement enuers eux. l’approuue celuy qui ayme moins son enfant, d’autant s qu’il est ou teigneux ou bossu. Et non seulement, quand il est malicieux ; mais aussi quand il est malheureux, et mal nay (Dieu mesme en a rabbatu cela de son prix, et estimation naturelle) pourueu qu’il se porte en ce refroidissement, auec moderation, et iustice exacte. En moy, la proximité n’allege pas les deffauts, elle les aggraue
